भारतीयांची आवडती बिग डॅडी एसयूव्ही महिंद्रा स्कॉर्पिओ नव्या अवतारात लाँच होणार आहे. ग्राहकांना या कारची गेल्या अनेक महिन्यांपासून प्रतीक्षा आहे. ही कार पुढच्या महिन्यात २७ जून रोजी लाँच होणार आहे. दरम्यान, लाँचिंगआधीच या कारचे संभाव्य फीचर्स समोर येत आहेत. देशात आतापर्यंत सर्वाधिक पसंती मिळालेल्या एसयूव्हींमध्ये स्कॉर्पिओचं स्थान वरचं आहे. कंपनी आता या कारचं नेक्स्ट जनरेशन मॉडेल बाजारात दाखल करणार आहे. दरम्यान नवीन स्कॉर्पिओचं नवीन नावदेखील समोर आलं आहे. या कारचं नाव स्कॉर्पिओ एन (Scorpio N) असं असणार आहे. Mahindra Scorpio N च्या पॉवर फीचर्स व्यतिरिक्त अनेक महत्वाच्या फीचर्सची माहिती समोर आली आहे. त्याबद्दल आम्ही तुम्हाला सांगणार आहोत.
काही मीडिया रिपोर्ट्सनुसार महिंद्रा स्कॉर्पिओ एन या कारमध्ये २.२ लीटर डिझेल आणि 2 लीटर टर्बो पेट्रोल इंजिन दिलं जाऊ शकतं. हे इंजिन याआधी एक्सयूव्ही ७०० (XUV700) आणि महिंद्रा थार (Mahindra Thar) या ऑफ रोडर एसयूव्हीमध्ये पाहायला मिळालं आहे. या कारमधलं डिझेल इंजिन १८५ पीएसपर्यंत पॉवर आणि ४५० न्यूटन मीटरपर्यंत पिकअप टॉर्क जनरेट करण्यास सक्षम असेल. तर पेट्रोल इंजिन २०० पीएस पॉवर आणि ३८० न्यूटन मीटरपर्यंत टॉर्क जनरेट करू शकतं. दोन्ही इंजिन ६ स्पीड मॅन्युअल आणि ६ स्पीड टॉर्क कन्व्हर्टर ऑटोमॅटिक गिअरबॉक्ससोबत येतील.
सध्याच्या स्कॉर्पिओपेक्षा वेगळा लूक आणि डिझाईन
दरम्यान, नवीन स्कॉर्पिओ एनचे काही फोटो प्रसिद्ध झाले आहेत. ज्यामध्ये ही कार आतून आणि बाहेरून खूपच आकर्षक असल्याचे पाहायला मिळत आहे. ही कार ६ सीटर आणि ७ सीटर व्हेरिएंटमध्ये उपलब्ध असेल. या कारमध्ये कॅप्टन सीटदेखील मिळेल. यात थ्री रो सीटिंग अरेंजमेंट पाहायला मिळेल. अशी सीटिंग अरेंजमध्ये सध्याच्या मॉडेलमध्ये पाहायला मिळत नाही. सध्याच्या स्कॉर्पिओमध्ये फ्रंट फेसिंग सीटऐवजी साइड फेसिंग जंप सीट उपलब्ध आहेत. त्यामुळे डिझाइनच्या बाबतीत नवीन स्कॉर्पिओ एन सध्याच्या मॉडेलपेक्षा थोडी वेगळी दिसते.
दमदार फीचर्स मिळणार
नवीन स्कॉर्पिओच्या फीचर्सबद्दल बोलायचे झाल्यास, Scorpio N मध्ये मागे आणि पुढे दोन्ही बाजूला एलईडी लाईट्स मिळतील. तसेच यात इलेक्ट्रिक सनरूफ, ड्युअल झोन क्लायमेट कंट्रोल, ८ इंचांची टचस्क्रीन इन्फोटेनमेंट सिस्टिम, मल्टिपल एअरबॅग्ज, ३६० डिग्री कॅमेरा हे महत्त्वाचे फीचर्स मिळतील. तसेच यात अॅक्टिव्ह आणि पॅसिव्ह सेफ्टी फीचर्सदेखील मिळतील. या कारची किंमत १० लाख रुपयांपासून सुरू होईल.
